Brač Online

Naslovnica Tko smo mi Donacije Portal na Facebooku

Pučiška čitaonica "Hrvatski Skup" dogodine slavi 150 godina svog postojanja, užežin te velike obljetnice prenosimo prigodni tekst Slavena Puljka obavljen na FB stranici Pučišća.

 

 

x
 

 

 



Dogodine naša čitaonica "Hrvatski skup" slavi 150 godišć postojanja. Rojena daleke 1868. bila je meju prvima čitaonicima u Dalmaciji. Pučišća su bila meju prvima općinima na Broču di su Hrvoti na izborima pobijedili Talijanoše.
Njezin moto "Česta kaplja kamen dube" duro do danas.

Obo tien ča je znočila za Pučišća, kojo su puno godišć bila bročki cientar ol kulture, zapisono je puno i obo njuon zno se sve.
Naš mlaji svit ne more ni znat če nan je znočila.
Čitaonica u njiezino zlatno doba, tamo pri 50 godin kal je napravjen zadružni dom, a na podu je bila čitaonica i kancelarije Zadruge.
Sad je tamo hotiel "Porat", a njiezinu ulogu priuziela je današnjo knjižnica istega imena.
Tih godin živila je svoje zlotne done, pogotovo zimi kal sve zamre i kal smo somi sa sobon.

Jemala je veliku prostoriju sa dvo stola za biljor. Na jednien su se igrale buće, a na drugen biljor če se zove karambol.
U drugon manjon prostoriji su bili stoli, tuol su se štili novine i libri, igro šah. Već je bila duošla letrika i bilo je jedno radijo, uono če jemalo drvenu škatulu i zeleno oko. Služilo je za slušot vijesti, mužiku, a najveće za prijenos kal je igro Hajduk. Poslin je prvo televizija u mistu bila ono u čitaonici.

Bila je jedna molo kantina za skuhot kafu i popit koju žesticu ili suok. Tamo su se prodovali španjuleti i novine kojie su dolazile vaporon oko 5 uri.
U počietku je rodi šjor Frane Čekić koji je još pri rata jemo svoju kavanu. Jemo je šest i mot provega ugostitelja, a kuho je nojboju kafu na Broču i okolo.

Kasnije ga je naslidi Guojko koji je isto tako kuho dobru kafu po riceti šjor Franie.
Kako svaku priču vajo začinit, evo dvi viezone za šjor Franu i Guojkota.
Godina 1953. Na zidu je visila slika cilega ondašnjega politbiroa KPJ. Tito u sridi, a livo i desno Kardelj, Ranković, Đilas, Gošnjak, Bakarić, Pijade i drugi.
Prvi je zglajzo Đilas. Dolazi Živan i govori: "Šjor Frane, ovoga vajo skinut!", a šjor Frane će:"Oštija, ako ćeš i sve!"

Guojko je bi drugačij.
Kako su se prodovale novine ni se puno zamoro njihovin imenima, a pogotovo kad je poče stizot strani tisak. Francuski Le Mond zvo je Monda, talijansku La Domenica Duome, a beogradsku Ilustrovanu politiku zvo je Inostrana. Dalekovidan je bi Guojko.
Lako ti je bilo bit dalekovidan 1990., ma doj ti bit dalekovidan 1970.!

Jedon put uleti u čitaonicu jedna bitna Njemica sva zajapurena i potna od muke po zavapi:"Bitte toalet. Bitte schnell, schnell!"
Guojko mrtav hladan uzvroti:"Duojdite posli, još ni duošo vapor!"



Tekst: Slaven Puljak
Fotografija: TZ Pučišća

Podijelite ovaj članak

Submit to DeliciousSubmit to DiggSubmit to FacebookSubmit to Google PlusSubmit to StumbleuponSubmit to TechnoratiSubmit to TwitterSubmit to LinkedIn